Ызгаардуу кышта бир үй-бүлөгө жылуулук тартуулаңыз

Кыргызстандын тоолуу аймактарында жана Чүй өрөөнүндө кыш мезгили узак жана катуу болот. Ноябрь айынан марттын аягына чейин түнкүсүн абанын температурасы -25°Cден -30°Cге чейин (бийик тоолуу аймактарда андан да төмөн) төмөндөйт. Айыл жергесинде жана жаңы конуштарда жашаган аз камсыз болгон үй-бүлөлөрдүн көпчүлүгү үйлөрүн мешке көмүр жагып жылытышат.

«Алтын Уя» коомдук фонду жыл сайын суук түшкөнгө чейин жана кыш ичинде жетим балдар жашаган үйлөрдү, жалгыз бой энелерди, кары-картаңдарды жана мүмкүнчүлүгү чектелген жарандарды жеринен аныктап, кышкы отун-көмүр менен камсыздайт.

Көмүр жардамы кантип жеткирилет?

• Муктаждыкты аныктоо: Фонддун социалдык кызматкерлери Бишкек шаарынын чет жакаларындагы жана Чүй облусунун айылдарындагы муктаж үй-бүлөлөрдүн тизмесин тактайт.
• Үйгө чейин жеткирүү: Сапаттуу, табы күчтүү көмүр мүшөктөлүп же унаа менен түздөн-түз үй-бүлөлөрдүн короосуна түшүрүлүп берилет.
• Комплекстүү колдоо: Көмүр таратуу учурунда балдардын кышкы жылуу кийим-кечеси жана «Береке кутусу» азык-түлүк муктаждыктары да эске алынат.

Сиздин колдооңуз менен балдар кыштын суугунда үшүбөй, жылуу үйдө сабактарын окуп, тынч уктай алышат.