Бул — баланын өзүн коопсуз сезген, дасторконго отурган, сабагын окуган жана эртеңине даярданган уянын окуясы.
«Алтын Уянын» тарыхы
Кыргыз маданиятында «алтын» жөн гана металлдын аты эмес; баалуу, кадырлуу нерсени да билдирет. Алтын бала — кымбат бала. Алтын сөз — кымбат сөз.
«Уя» болсо куш баласын чоңойткон, коргогон, баккан жана учууга даярдаган жер.
Алтын Уя. Атыбызды биз тандаган жокпуз; ал биздин ишибиздин аныктамасы.
Үй куруу мүмкүн. Ичине керебет коюп, үстөл жайгаштырып, ашканасын даярдай аласыз. Бирок аны уя кылган нерсе — анда жашаган адамдын өзүн коопсуз, баалуу жана өз жери катары сезиши.
Бала дасторконго отурганда өзүн конок катары сезбесе, кечинде сабак окуганда жанында бирөөлөр бар экенин билсе, ооруп калганда аны карай турган адам бар экенине ишенсе, мектептен келгенде ача турган эшиги болсо — анда ал жер жөн гана имарат эмес.
Уюштуруу түзүлүшү
«Алтын Уя» Коомдук фонду — Кыргыз Республикасынын мыйзамдарына ылайык катталган, коомдук пайда үчүн иштеген коммерциялык эмес социалдык фонд. Тамыры 2009-жылы негизделген «Алтын Уя» камкордук үйүнө таянган фонд 2020-жылдын 27-ноябрында коомдук фонд катары катталып, 2024-жылдын 2-сентябрында Чүй-Бишкек юстиция башкармалыгында кайра каттоодон өткөн.
Расмий реквизиттери: Каттоо №: 193921-3301-ОФ | ИНН: 02711202010186 | ОКПО: 30952301 | ГКЭД (Экономикалык ишмердүүлүк түрлөрүнүн мамлекеттик классификатору): 94999.
Башкаруу органдары: Уставга ылайык Фонддун жогорку органы — Уюштуруучулардын жалпы чогулушу, текшерүү органы — Текшерүү комиссиясы, аткаруучу органы — Директор (Сатимов Алишер Момунжанович). Каржылык отчеттуулук жыл сайын көз карандысыз аудитор тарабынан текшерилет.
Даректерибиз: Юридикалык дареги: Чүй облусу, Аламүдүн району, Кара-Жыгач айылы, Яковенко көч., 43/1 | Башкы кеңсе: Бишкек ш., Мичурин көч., 80 | Ырайым үйү: Чүй облусу, Ысык-Ата району, Новопокровка айылы.
Биз жөнүндө
Биз эки башка ишти катар алып барабыз: күн сайын балдар жашаган уяны иштетебиз, ошону менен катар өлкө боюнча муктаж үй-бүлөлөргө жетебиз.
Новопокровкадагы Ырайым үйү. Чүй облусунун Ысык-Ата районундагы Новопокровка айылында. Бул жерде балдар жатып окушат: үч маал тамак, ден соолук көзөмөлү, мектеп унаасы, кечки сабак, англис тили жана компьютердик сабаттуулук.
Өлкө боюнча социалдык колдоо. Бишкектен алыскы айылдарга чейин: мектеп буюмдары, азык-түлүк, кышкы көмүр жана кийим, дарылоо чыгымдары, таза суу кудуктары. Муктаждыкты жалгыз аныктабайбыз; айыл өкмөтү, мектеп жана фонддун талаа комиссиясы чогуу иштешет.
Миссиябыз
Алты негизги багытта иштейбиз. Ар бири жыл бою уланган туруктуу программа; мезгилдик кампания эмес.
Ырайым үйү — Новопокровкада балдар жашаган жай: турак-жай, тамак, ден соолук, кечки сабак.
Билим — мектеп топтому, форма, окуучуга камкордук, тил жана компьютер курстары.
Таза суу — суу түтүгү жок айылдарда терең кудук казуу.
Ден соолук — операция жана узак дарылоо чыгымдары үчүн шашылыш фонд.
Кыш — көмүр, кышкы кийим, бут кийим, меш оңдоо.
Береке кутусу — ун, май, күрүч, чай: негизги азык-түлүк пакети.
Көрөгөчтүгүбүз
Кыргызстанда жана Борбор Азияда балдарды коргоо, билим берүү жана ачык отчеттуулук жаатында ишенимдүү, туруктуу жана үлгү болгон мекеме болуу.
Көрөгөчтүк кыял эмес, ченөөгө боло турган багыт. Ошондуктан аны үч конкреттүү шартка бөлдүк жана жылдык отчетубузда ушул үч шарт боюнча кайда турганыбызды жазууну пландап жатабыз:
Ишеним. Ар бир сом кайда кеткенин суралбай көрсөтө алган мекеме: жылдык отчет (даярдалууда), ачык бухгалтерия, документтештирилген талаа иши.
Туруктуулук. Бир гана мезгилдик кампанияга көз каранды болбогон, баланын билимин жылдар бою көтөрө алган каржылоо модели.
Жайылтыла турган модель. Новопокровкадагы тажрыйбанын башка облустарда жана Борбор Азияда кайталанышы.
«Эң чоң фонд болуу» биздин кыялыбыз эмес. Биз үчүн өсүү — сан жагынан эмес, ишеним жагынан өсүү.
Бүгүнкүсүнө колдоо көрсөтүп, эртеңине уя болуу
Биз, «Алтын Уя» фонду, баланы борборго койгон түшүнүк менен иштейбиз. Түзүлгөн күндөн бери талаада жолуккан ар бир кыйынчылык бизди көбүрөөк жоопкерчилик алууга, көбүрөөк документтештирүүгө жана ачык иштөөгө түрттү. Бизге ишенип берилген ар бир салым — аманат; аманаттын эсеби суралбай да берилет.
Ыктыярчы болуңуз
Новопокровкадагы жайдан Бишкектен алыскы айылдарга чейинки иштин ар бир кадамында ыктыярчыларга муктажбыз: кечки сабакта сабак берген мугалимге, жарманке күнү стенд курган топко, талаа отчетун орус тилине которгон адамга, кудук изилдөөсүндө кеңешин айткан инженерге.
Кыргызстандагы ишти кыргызстандыктар жүргүзөт; өнөктөштөр колдойт, ордун баспайт. Сиз да ушул ынтымактын бир бөлүгү боло аласыз.
